Reforzando o apoio con visión de futuro

Un dos proxectos que temos actualmente en marcha en Retnova é a realización do estudo diagnóstico e do Plan integral de actuación para a renovación e o impulso dos CIM de Galicia.

Neste primeiro semestre do ano estivemos traballando na primeira fase do proxecto: o estudo diagnóstico previo. Este traballo é esencial para comprender en profundidade as características, necesidades e evolución da demanda destes Centros de Información á Muller, que desempeñan un papel fundamental no apoio e acompañamento das mulleres na nosa comunidade.

Para garantir un achegamento rigoroso e completo, utilizamos unha metodoloxía mixta que integrou ferramentas cuantitativas e cualitativas. Realizouse unha consulta telemática a todos os concellos galegos, así como entrevistas en profundidade e grupos focais. Este enfoque permitiu obter unha visión global e enriquecida da situación dos Centros de Información á Muller de Galicia.

A partir dos resultados deste estudo, formularanse actuacións específicas que se integrarán no plan integral de actuación para a renovación e o impulso dos Centros de Información á Muller de Galicia.

Dende Retnova, queremos expresar o noso agradecemento á Dirección Xeral de Promoción da Igualdade pola confianza depositada en nós para levar a cabo este proxecto tan relevante, que reforza o noso compromiso coa promoción da igualdade e coa construción dun modelo social máis equitativo, atento ás necesidades reais das mulleres e orientado ao benestar colectivo.