Avanza o proceso de elaboración do Plan Estratéxico de Discapacidade de Galicia

Continuamos cos traballos de elaboración do novo Plan Estratéxico de Discapacidade de Galicia, un instrumento orientado a definir as prioridades e liñas de actuación das políticas públicas en materia de discapacidade para os vindeiros anos.

Avanzamos coas accións participativas previstas, co obxectivo de garantir que a voz das persoas con discapacidade estea presente no proceso de definición das futuras liñas estratéxicas, a través das entidades que as representan. Este traballo permite incorporar a experiencia, o coñecemento e as achegas do ámbito da discapacidade en Galicia para avanzar cara a un plan útil, realista e aliñado coas necesidades do sector.

Nestes días desenvolvemos sesións de traballo que permitiron identificar retos, necesidades e prioridades desde unha perspectiva plural e conectada coa realidade social da discapacidade. Paralelamente está en marcha a consulta aos departamentos da administración autonómica, co propósito de integrar a perspectiva da discapacidade no conxunto das políticas públicas autonómicas.

O proceso participativo constitúe unha das pezas centrais da elaboración do plan, xa que favorece a incorporación de coñecemento especializado, experiencia práctica e visión compartida arredor dos principais desafíos do ámbito da discapacidade.

Desde Retnova valoramos moi positivamente a implicación e participación das entidades asistentes e continuamos a traballar nas seguintes fases do proxecto, orientadas á definición das liñas estratéxicas e das medidas que conformarán o futuro Plan Estratéxico de Discapacidade de Galicia.