25/09/23
Desde 1999, o 23 de setembro conmemórase en todo o mundo o Día contra a explotación sexual e a trata de mulleres, nenas e nenos. A data elixida lembra a promulgación da primeira lei contra a prostitución infantil a nivel mundial, a chamada "Lei Palacios", que Arxentina oficializaba ese mesmo día de 1913.
Segundo a Oficina das Nacións Unidas contra a Droga e o Delito, UNODC, o tráfico de persoas é "o recrutamento, transporte, traslado, recepción ou acollemento de persoas mediante o uso da forza, fraude ou engano, coa intención de explotalas con fins lucrativos". Este problema afecta principalmente a persoas en risco de exclusión social. Unha das súas principais manifestacións é a explotación sexual: a Comisión Europea estima nun 56% a porcentaxe deste tipo de delitos, co que é a forma predominante de violencia dentro da trata de persoas, moi por enriba do tráfico de órganos ou o traballo forzoso.
A data serve para lembrar que o problema da explotación sexual persiste en todo o mundo. No noso país, o Instituto Nacional de Estatística estima en 0,40 por cada 100.000 habitantes o número de vítimas da trata de persoas. Deles, 0,29 corresponden a vítimas de explotación sexual. Cando se vai ao detalle en Galicia, a estatística baixa ata 0,11 persoas por cada 100.000 habitantes. O contrapunto a este dato achégao o Ministerio de Interior co balance de vítimas liberadas das redes de trata de persoas con fins de explotación sexual: 129 persoas en 2022, das que catro eran menores. O número de vítimas rescatadas de situacións de explotación sexual, sen pertencer a redes de trata, foi maior: 435 en 2022, dez delas menores.
En Retnova colaboramos na loita contra esta problemática coa elaboración do Plan galego contra a trata de persoas con fins de explotación sexual 2022-2024 da Xunta de Galicia. O documento inclúe cinco áreas estratéxicas e 11 obxectivos operativos que se implementan a través de 59 medidas. Un esforzo co que reforzar o noso compromiso cos dereitos sociais e a igualdade e co que contribuír á protección das vítimas e á erradicación deste problema.
Compartir en
C/República Checa nº40, Polígono de Costa Vella, 15.707, Santiago de Compostela, A Coruña
www.retnova.com · · 604 078 903·609 848 602
© ReTnova 2021