Formación inicial en igualdade

O Centro Autonómico de Formación en Innovación da Consellería de Educación, Universidade e Formación Profesional, encargado do deseño das accións da formación permanente do profesorado, confiou no equipo de RETNOVA para titorizar a 2ª quenda do curso “Formación inicial en igualdade para funcionariado en prácticas” neste último trimestre do ano.

Este curso consistiu nunha formación en liña, a través da Plataforma de Teleformación Galega (PLATEGA), sobre conceptos básicos, lexislación en materia de igualdade, políticas públicas, violencia de xénero e coeducación.

Damos as grazas a todo o profesorado participante nesta quenda pola súa implicación. Confiamos en que, tras a formación recibida, sexan quen de desenvolver o seu labor docente e orientador con maior consciencia da necesidade de aplicar a perspectiva de xénero.

Rematamos así o noso labor de titorización en liña neste ano 2022 no que formamos a profesorado, persoal ao servizo da Administración xeral da Comunidade Autónoma de Galicia, das entidades públicas instrumentais, da Administración institucional, das entidades locais, da Administración de xustiza e persoal de administración e servizos das Universidades galegas.

Agradecidas por todas as oportunidades que nos foron brindadas durante este ano e ilusionadas polos novos proxectos formativos que nos deparan!

Grazas!