Formación para a Academia Galega de Seguridade Pública - AGASP

Recentemente comezamos o curso "Ciberviolencias sexistas” no marco do plan de formación da Academia Galega de Seguridade Pública (AGASP).

Esta acción formativa desenvólvese en modalidade mixta, combinando a formación en liña con sesións telepresenciais e presenciais, o que permitirá afondar nos coñecementos e fomentar o intercambio de experiencias entre o alumnado.

Nela, logo dunha contextualización conceptual, normativa e programática que permitirá enmarcar os contidos, profundarase nas distintas formas que pode adoptar a violencia de xénero nos espazos dixitais. Abordaranse temas como o ciberacoso, a sextorsión, a difusión non consentida de contidos íntimos, a violencia simbólica ou as violencias cómplices, entre outras, e analizarase como estas prácticas afectan as mulleres.

O obxectivo principal é dotar ao alumnado (profesionais dos corpos e forzas de seguridade e de emerxencias) das ferramentas necesarias para recoñecer, previr e actuar fronte ás ciberviolencias sexistas.

Grazas á AGASP por confiar en Retnova na súa aposta pola formación en materia de igualdade e prevención das violencias machistas.