Fomentando a igualdade no seo das organizacións

En RETNOVA traballamos amplamente no ámbito social, colaborando con organismos e empresas con vinculación neste eido e desenvolvendo un labor especializado en distintas temáticas relacionadas. Entre as nosas liñas de traballo está a prestación de servizos especializados en igualdade, onde vimos de colaborar con IGAXES, ONG para o futuro da infancia e a xuventude en risco, na elaboración do seu Plan de Igualdade entre Mulleres e Homes.

A redacción deste documento é froito dun exhaustivo traballo e negociación coas diversas representacións da entidade e as organizacións sindicais do sector. Un labor no que IGAXES deixou claro o seu compromiso no avance da igualdade entre mulleres e homes no seu cadro de persoal, cunha aposta pola corresponsabilidade e a conciliación.

Aquí, a negociación efectuada entre representantes do cadro de persoal e empresa traduciuse no acordo pola progresiva implantación de novos permisos, a ampliación dalgúns existentes e outras medidas favorecedoras da harmonización da vida persoal, familiar e laboral.

Desde RETNOVA amosamos a nosa satisfacción por formar parte deste proceso, co que contribuímos a mellorar a vida das persoas con base na igualdade de dereitos e oportunidades, á vez que agradecemos á entidade o gran compromiso da organización na elaboración deste plan.