Xogos dixitais para concienciar sobre igualdade

O equipo de Retnova vén de rematar unha serie de accións para promover a igualdade entre o alumnado dos centros educativos de Secundaria do Concello de Santiago de Compostela. Nestas sesións convidouse a rapaces e rapazas a participar por equipos no xogo virtual A-BANEANDO as violencias machistas.

Os recursos lúdicos son ferramentas idóneas para o fomento da igualdade entre a poboación adolescente. En concreto, os xogos virtuais permiten achegar dunha forma máis adecuada á rapazada materiais de distintos tipos, como cancións, vídeos ou textos de redes sociais, que funcionan mellor á hora de familiarizala cos conceptos relacionados co amor romántico, a violencia de xénero e outras formas de discriminacións.

Nas dinámicas acadouse un bo grao de participación co que, máis aló de contribuír ao coñecemento destes conceptos, conseguiuse que alumnas e alumnos intercambiasen experiencias. Unha forma de favorecer a aprendizaxe cooperativa, na que os e as estudantes participan nas actividades de forma activa e colectiva, buscando acadar un ensino máis consistente.

Con estas sesións conclúe esta última edición da campaña COMPigual, a iniciativa para a comunidade educativa coa que Retnova veu colaborando nos últimos dous anos co Concello de Santiago.

Agradecemos ao equipo de Igualdade municipal esta oportunidade para contribuír á promoción destes valores nos centros educativos.