18/07/23
Rematan os traballos de elaboración do protocolo “Burela tecendo rede contra as violencias machistas”, do que Retnova levou a asistencia técnica. Este documento, impulsado polo Concello de Burela a través da Mesa Local de Coordinación Interinstitucional contra a Violencia de Xénero, quere promover unha actuación máis áxil e efectiva na atención ás vítimas de violencia contra as mulleres, así como aos seus fillos e fillas, do concello da Mariña Lucense.
Para iso, o protocolo define as áreas de intervención das organizacións presentes na Mesa, representantes á súa vez dos principais ámbitos de atención ante un caso de violencia machista: o das forzas e corpos de seguridade, a social, a sanitaria e a educativa. No documento faise fincapé nos puntos de coordinación entre as distintas áreas e os organismos que as compoñen, co obxectivo de clarificar os seus papeis e, así, evitar caer en situacións como a dobre victimización da muller.
A elaboración deste protocolo centralizou o labor da Mesa nos últimos meses. A proposta inicial produciuse na segunda reunión deste organismo. Desde entón traballouse neste proceso de forma conxunta, a través das diferentes convocatorias da Mesa, nas que o texto foi debatido entre todos os organismos, e tamén a través de reunións unilaterais ou das organizacións pertencentes a unha mesma área.
Con esta acción, a Mesa cumpre parte dos obxectivos marcados no seu regulamento, en concreto no que se refire a coordinar as institucións implicadas na prevención e na loita contra a violencia de xénero no ámbito local; e a establecer procedementos de actuación conxunta e de coordinación municipal e interinstitucional que posibiliten a atención, protección e apoio psicosocial ás vítimas da violencia de xénero.
En Retnova apostamos polo traballo en colaboración con diferentes organizacións en materia de prevención da violencia de xénero e atención ás vítimas. Con este tipo de actuacións contribúese a axilizar a resposta a estes casos e, así, mellorar a rede a través da que protexer a estas mulleres.
Compartir en
C/República Checa nº40, Polígono de Costa Vella, 15.707, Santiago de Compostela, A Coruña
www.retnova.com · · 604 078 903·609 848 602
© ReTnova 2021